09:53 08 июля 2013 г.
ÇĂМĂЛ АТЛЕТИКА
Челябинскра 1996–1997 çулсенче çуралнă каччăсемпе хĕрсен çăмăл атлетика енĕпе çĕршыв ăмăртăвĕ вĕçленнĕ. Кăнтăр Урал тĕп хулинче 73 регионти спортсменсем вăй виçнĕ. Чăваш енрен унта 11 атлет хутшăннă, вăл шутра – пирĕн районти Шĕнер Ишекре çуралса ÿснĕ çамрăк Семен Семенов та.
Каччă 3000 метрлă дистанцире бронза призер пулса тăнă.
Пĕтĕмĕшле чăваш спортсменĕсем унта виçĕ кĕмĕл, икĕ бронза медаль çĕнсе илнĕ.
ПУÇЛĂХ КУНĔ
Чăваш Республикин муниципаллă пĕрлĕхĕсен дирекцийĕн пуçарăвĕпе Красноармейски районĕнче улттăмĕш хут Пуçлăх тата муниципаллă служаци кунĕ иртнĕ. Малтанхи çулсемпе танлаштарсан унта поселенисен пуçлăхĕсемпе вĕсен пулăшуçисем çеç мар, район-хула администрацийĕсен пуçлăхĕсем те хутшăннă.
Вăрнарсен команди те район администрацийĕн пуçлăхĕ Леонид Николаев ертсе пынипе унта хастар пулнă. Программа тăрăх вĕсем «Тăван ялăм» спорт эстафетинче, мини-триатлон программипе хутăш эстафетăра (ишесси,чупасси, пăшалтан пересси тата автомобиль тытса пырасси), утă çулса, вутă çурса, пляж волейболĕнче, мини-футболта тупăшнă, канăва тивĕçлĕ йĕркелес тата апат-çимĕç хатĕрлес енĕпе ăмăртнă, юрлас-ташлас пултарулăха кăтартнă.
ФУТБОЛ
Раççей первенствин йĕркипе юн кун Вăрнарти «Химик» стадионта Атăлçи федераци округĕн зонин черетлĕ тĕл пулăвĕ иртрĕ. «Химик-Августăн» 1998 çулта çуралнă каччисем унта Киров облаçĕнчи «Динамо-ДЮСШ-5» командăпа вылярĕç, хăнасене 2:0 шутпа парăнтарчĕç.
Аслă дивизионра ултă тĕл пулу хыççăн Вăрнарти «Химик-Август» пĕрремĕш вырăна хальлĕхе «Динамо» командăпа пайлать. Вĕсен иккĕшĕн те 18-шар очко. Виççĕмĕш вырăнта – Шупашкарти ОМОН, унăн 16 очко. Ку командăпа матч ыран пулать.
ФИТНЕС
Ытлари кун Çĕмĕрлере «Олимп» ача-пăча пултарулăх çурчĕн уçă первенствине Вăрнарсен виçĕ команди – «Химик» спорт клубĕн «NEXT», Çĕрпел шкулĕнчи «Ремикс» тата Кĕçĕн Кипекри «Танцующие звезды» – хутшăннă.
Елена Аликован вĕренекенĕсем – «NEXT» ушкăн – степ-аэробика енĕпе 11–13 çулхисен ÿсĕмĕнче пĕрремĕш вырăн йышăннă.
Светлана Чикмякова
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии