08:47 03 июня 2013 г.
Ĕнесене машинăпа сăвакан операторсемпе техник-осеменаторсен районти
конкурсĕсем кашни çул иртеççĕ. Кăçал вĕсем «Броневик» хуçалăхра пулчĕç.
Ăмăртăва савăнăçлă лару-тăрура район администрацийĕн ял хуçалăхĕпе экологи
пайĕн пуçлăхĕ Вячеслав Горбунов уçрĕ, ял хуçалăх организацийĕсем район
агропромышленность комплексне аталантарассипе мĕнле ĕçленипе паллаштарчĕ.
«Броневик» кооператив тăрăшуллă ĕçлекен хуçалăхсенчен пĕри. Сĕт сутнипе кассăна
куллен укçа кĕрет, çавăнпа та кооперативра ĕне выльăх хисепне ÿстересшĕн.
Владислав Репин ертÿçĕ каланă тăрăх, кăçал пĕр витине реконструкцилесе çĕнĕ сĕт
пăрăхĕ вырнаçтарма палăртнă.
«Броневик» хуçалăхра ăмăрту ирттерме лайăх условисем туса панă. Вячеслав
Горбуновпа Владислав Репин пур конкурсанта та ăнăçу сунчĕç.
Ĕне сăвакансем те, техник-осеменаторсем те конкурссенче хастарлăх кăтартрĕç.
Судьясене – район администрацийĕн ял хуçалăхĕпе экологи пайĕн тĕп специалистне
Георгий Романова, ял хуçалăх техникумĕн преподавательне Михаил Алексеева,
районти выльăх-чĕрлĕх чирĕсемпе кĕрешекен станци пуçлăхне Николай Тихонова, унăн
çумне Георгий Иваничева, Альбина Гурьева ветврача, ветлаборатори тата
ветеринарипе санитари экспертизин заведующийĕсене Елена Анисимовăпа Леонид
Прокопьева, «Чувашское» обществăн пай пуçлăхне Михаил Казенова, Вăрнарти типĕтнĕ
сĕт завочĕн лабораторийĕн заведующине Ольга Павловăна – пĕтĕмлетÿсем тума çăмăл
пулмарĕ. Алевтина Тарасова («Янгорчино»), Ольга Козлова («Броневик») дояркăсем
иккĕшĕ те 98,8 балл пухса пĕрремĕш вырăн йышăнчĕç. Ирина Константинова (Карл
Маркс ячĕллĕ) пьедесталăн иккĕмĕш, Ирина Михайлова («Знамя») виççĕмĕш
картлашкисем çинче тăма тивĕçрĕç. Çамрăксенчен Андрей Павлов дояра («Кольцовка»)
çитекенни пулмарĕ. Фермăра нумай çул ĕне сăвакан операторсенчен чи маттурри –
Оксана Маркова («Мураты»).
Техник-осеменаторсен конкурсĕн пĕтĕмлетĕвĕ çапларах. Галина Росадина
(«Кольцовка») 85 балл пухса мала тухрĕ. Професси тĕлĕшĕнчен ăста пулнине
Валентина Смирновăпа (Карл Маркс ячĕллĕ) Алевтина Куликова («Броневик») та
çирĕплетрĕç, иккĕмĕшпе виççĕмĕш вырăнсене йышăнчĕç. Алиса Васильева (аш-какай
комбиначĕ) çамрăксенчен чи хастарри пулчĕ. Техник-осеменаторта чылай çул ĕçлекен
Светлана Петрова(«Мураты») та хăйĕн ушкăнĕнче мала тухрĕ.
Çĕнтерÿçĕсем район администрацийĕн Хисеп грамотине тата хаклă парнене
тивĕçрĕç. Çавăн пекех конкурса хутшăннисене те хавхалантарчĕç. Вĕсене парнесем
пачĕç, район администрацийĕн Тавĕпе чысларĕç.
Ăмăртăва килнисене Калинино ял тăрăхĕн артисчĕсем концертпа савăнтарчĕç.
Е.ПОРФИРЬЕВА
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии