10:11 29 мая 2013 г.
Районти ирĕклĕ майпа кĕрешекенсем тăтăшах хăйсен çĕнтерĕвĕсемпе савăнтараççĕ.
Тĕрĕссипе, вĕсенчен, спорт ăсталăхне чи çÿллĕ шайра кăтартакан спортсменсенчен,
урăххине кĕтместпĕр те.
Анчахрах спортсменсем черетлĕ ăмăртуран пысăк çĕнтерÿсемпе таврăннă. Районти
спорт шкулĕнче ăсталăха туптакан çамрăксем ку хутĕнче Атăлçи федераллă округри
вĕренекенсен VI çуллахи спартакиадинче малти вырăнсене тухма пултарнă.
Вăрнар тăрăхĕнчен тăватă вĕренекен район, республика чысне хÿтĕленĕ. Пăваяль
хĕрĕн Настя Иванован кăтартăвĕ пуринчен сумлă – вăл нихăш тупăшура та çĕнтерĕве
алăран вĕçертмен. Маттур хĕр Атăлçи федераллă округра пĕрремĕш пулса Раççей
шайĕнчи финалта çĕнтерÿшĕн кĕрешме тивĕçнĕ.
Аван результат кăтартнă тепĕр спортсмен – Пăртасри Яна Лукина. Вăл çĕнтерÿ
пьедесталĕн виççĕмĕш картлашки çине хăпарнă. Сергей Кириллова (Пăваяль) тата
Диана Яковлевана (Санарпуç) призерсен йышне кĕме кăшт ăнăçу çитмен – иккĕшĕ те
тăваттăмĕш вырăн йышăннă.
Çамрăк спортсменсен çитĕнĕвĕсенче вĕсене ирĕклĕ майпа кĕрешессин
вăрттăнлăхĕсене вĕрентекен Юрий Львов тата Виталий Трофимов тренерсен тÿпи
пысăк.
Унччен маларах районти кĕрешÿçĕсем Шăхасанти ăмăртура та палăрнă. 4 хут тĕнче
чемпионĕ С.Корнилов парнисемшĕн иртнĕ тупăшусенче Сергей Кириллов – иккĕмĕш,
Василий Михайлов виççĕмĕш пулнă.
И.ЯКОВЛЕВА
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии