09:12 20 мая 2013 г.
Чăваш ен Пуçлăхĕ Михаил Игнатьев Пенза облаçĕнче пулнă аварире вилнисен
тăванĕсемпе, çывăх çыннисемпе пĕрле хурланни çинчен пĕлтернĕ, Министрсен
Кабинетне инкек тÿснисене тата вĕсен çемйисене тивĕçлĕ пулăшу кÿрес ыйтăва пăхса
тухма хушнă.
Суранланнисемпе Раççей МЧСĕн Тĕп управленийĕн психологĕсем ĕçлеççĕ. Унсăр
пуçне МЧС психологĕсем инкек тÿснисен тăванĕсене пулăшма Чăваш ене килнĕ.
РФ Патшалăх Думин депутачĕ А.Аршинова та Пенза облаçĕнчи аварире вилнисен
тăванĕсемпе, çывăх çыннисемпе пĕрле хурланни çинчен пĕлтерет. «Ку инкек – чăтма
çук йывăр хуйхă. Сирĕн хурлăха пĕрле пайлатăп, çак инкеке тÿснĕ çемьесемпе
чунтан хурланатăп. Тавăрма çук пысăк çухатуна чăтса ирттерме вăй-хал çитерме
сунатăп»,– тенĕ вăл.
Пенза облаçĕнчи катастрофăра вилнисен тăванĕсемпе тата çывăх çыннисемпе пĕрле
хурланни çинчен пĕлтерекен телеграммăсем Чăваш ен Пуçлăхĕ ячĕпе килсех тăраççĕ.
«Пенза облаçĕнче çул çинче Чăваш ен çыннисем вилни çинчен çитнĕ хыпар питĕ
пăшăрхантарчĕ. Вĕсен çывăх çыннисене ман ятран чунтан тухакан хурланупа пулăшу
сăмахĕсене пĕлтерме ыйтатăп»,– çырнă Россотрудничество ертÿçин Константин
Косачевăн телеграмминче.
Çавăн пекех Пенза облаçĕнче пурăнакансен ячĕпе Василий Бочкарев губернатор та
инкекре вилнисен çемйисемпе пĕрле хуйхăрнине пĕлтернĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии