14:43 15 мая 2013 г.
Пограничниксен районти обществăлла организацийĕ хăшĕ-пĕрисем пек хут çинче
кăна шутланса тăракан пĕрлĕх мар. Ку организацие пĕрлешнĕ маттурсем – çарпа
патриотизм туйăмĕсене сарассишĕн, çĕршыв мăнаçлăхĕшĕн чăннипех çунакан
хастарсем. Çакна вĕсем сăмахпа мар, ĕçпе çирĕплетеççĕ. Çĕршывăн пулас
хÿтĕлевçисене – çамрăк ăрăва – тĕрĕс воспитани парассине, пурнăçри чăн
хаклăхсене хисеплеме вĕрентессине хăйсен чи пĕлтерĕшлĕ тивĕçĕ вырăнне хурса
ĕçлеççĕ запасри пограничниксем.
Организаци пуçарнипех акă Аслă Çĕнтерÿ кунĕ умĕн çамрăк армеецсен отрячĕсен
районти смотрĕ иртнĕ. Пограничниксемпе пĕрлех çар ăмăртăвне йĕркелеме район
администрацийĕн вĕрентÿпе çамрăксен политикин пайĕ, «Мила» общество,
«Георгиевский» хутор казакĕсем пысăк тÿпе хывнă.
Поселокри тĕп площадьре пухăннă 16 отрядран 11-шĕ аслă, тепĕр 5-шĕ кĕçĕн
ушкăнсенче уйрăммăн ăмăртнă. Хăй вăхăтĕнче çĕршыв чиккисене хÿтĕленĕ
пограничниксем, запасри ытти офицерсем çамрăк армеецсене конкурсра ăнăçу суннă май чăн-чăн патриотсем пулма, çĕршыв ирĕклĕхĕшĕн хăйсене шеллемесĕр кĕрешнĕ ветерансенчен тĕслĕх илме чĕнсе каланă.
Смотра хутшăннă отрядсене хаклама жюрине çăмăл килмен. Пур команда та ăйсене
чăн салтаксенчен кая мар кăтартма тăрăшнă. Типтерлĕ çар тумтирĕ, стройпа утма
пĕлни, юрăпа утни, вырăнта командăсене пурнăçлани, командир ăсталăхĕ – чи
маттуррисене палăртма жюри пĕтĕмпех шута илнĕ.
Тĕлĕнме кирлĕ мар: икĕ ушкăнра та (аслисен те, кĕçĕннисен те, Калининăри шкул
ачисем ытти командăсене çĕнтерме нимĕнле шанăç та хăварман. Çарпа патриотизм
воспитанийĕ, çар хатĕрленĕвĕ енĕпе кунта çÿллĕ шайра ĕçленипех ĕнтĕ кадетсем
республикăра анчах мар, Пĕтĕм Раççейре чапа тухрĕç. Ахальтен пулмаççĕ кунашкал çĕнтерÿсем. Хальхинче те Калининăри çамрăк армеецсем – Раççей Геройĕ Сергей Ашимихин ячĕллĕ спецназовецсен отрячĕ тата Руслан Желудкин паттăр пограничник ячĕллĕ пограничниксен çамрăк тусĕсен отрячĕ – районти смотрта тивĕçлипе пĕрремĕш вырăн йышăннă. Аслă ушкăнра иккĕмĕшпе виççĕмĕш вырăнсене Вăрнарти 1-мĕш тата Вăрманкасри шкулсен командисем тухнă. Кĕçĕн ушкăнра, жюри хаклавĕпе, Хапăсри тата Вăрнарти 2-мĕш шкул отрячĕсем иккĕмĕшпе виççĕмĕш пулнă.
И.ЯКОВЛЕВА
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии