00:00 20 февраля 2013 г.
Кĕçнерни кун – эрне кун Йĕпреçре иртнĕ республикăри Хĕллехи ял спорт вăййисенче пĕтĕмĕшле кăтартупа Вăрнар районĕ пĕрремĕш вырăн йышăнчĕ
Çĕнтерĕве спортсменсем тĕрлĕ тĕсре туптарĕç. Чи лайăх кăтарту яланхиллех – полиатлонистсен. Ершепуç ял поселенийĕн команди хальхинче те чи вăйли пулнине çирĕплетрĕ. Уйрăмшар зачетра та вĕсемех малтисем, Сергей Политовпа Анна Григорьева – пĕрремĕш, Галина Павлова – иккĕмĕш, Александр Политов – тăваттăмĕш вырăнта.
Тепĕр эрнерен вăрнарсен команди Красноярск хулине тухса кайĕ – Пĕтĕм Раççейри ял спорт вăййисенче республика чысне хÿтĕлĕ.
Ытти тĕссенчи çитĕнÿсемпе те савăнмалла. Механизаторсен конкурсĕнче аш-какай комбинатĕнче ĕçлекен Надежда Семеновапа Юрий Сорокин виççĕмĕш вырăн йышăнчĕç.
Доярсен команди те – «Янгорчино» ял хуçалăх кооперативĕнче тимлекен Алевтина Тарасовапа Елена Михайлова – бронза призерсем. Уйрăмшар тупăшура Алевтина иккĕмĕш, Елена виççĕмĕш пулчĕç.
Мăньял Хапăсри Тикиневсем çемьесен конкурсĕнче çĕнтерÿ пьедесталĕн виççĕмĕш пусми çине хăпарма тивĕçрĕç.
Йĕлтĕр чупăвĕнче район чысне Вăрманкас ял поселенийĕн команди хÿтĕленĕ. Владимир Тикинев, Дима Тикинев, Ирина Тикинева тата Эльвира Чугунова та командăпа «бронзăна» тивĕçрĕç.
Кире пуканĕ йăтассипе пирĕн спортсменсем (Ярмушка ял поселенийĕнчен) уйрăмшар зачетра призлă вырăнсене лекнĕ пулин те: Екатерина Козлова иккĕмĕш, Екатерина Степановапа Александр Емельянов виççĕмĕш – пĕтĕмĕшле кăтартусемпе пиллĕкмĕш вырăн йышăннă.
Команда результачĕсемпе вăрнарсем çавăн пекех шывра ишессипе тăваттăмĕш, шашкăлла çиччĕмĕш, шахматла тăххăрмĕш, йĕлтĕрçĕсем-ветерансем вун виççĕмĕш пулнă.