00:00 06 февраля 2013 г.
Йĕпреçре СССР спорт мастерĕн Орест Маркияновăн парнисене çĕнсе илессишĕн иртнĕ республика первенствинче Вăрнар районĕн çамрăкĕсем каллех ăнăçлă кĕрешнĕ – вунă медаль çĕнсе илнĕ.
Пăртасри Яна Лукина, Санарпуçĕнчи Наталия Дмитриева (турнирта вĕсем ылтăн призерсем пулса тăнă), Пăваяль хĕрачи Настя Иванова, Вăрнар каччи Сергей Кириллов – иккĕшĕ те Шупашкарти олимп резервисен училищинче вĕренеççĕ, Санарпуçĕнчи Регина Красновапа Диана Яковлева (кĕмĕл призерсем) унта çÿллĕрех шайри ăмăртăва хутшăнма тивĕç çĕнсе илнĕ, республикăн пĕрлештернĕ команди йышĕпе кĕçех вĕсем Пĕтĕм Раççейри турнира хутшăнĕç.
Вăрнарсенчен çавăн пекех çĕнтерÿ пьедесталĕ çине тата тăваттăн хăпарма тивĕçнĕ, вĕсем – бронза призерсем: Санарпуçĕнчи Василий Михайлов, Сергей Сафронов, Марина Осипова тата Пăртасри Люда Семенова.
Хăш-пĕр çамрăкшăн çак турнир сумлă пĕрремĕш ăмăрту пулчĕ. Апла пулин те вĕсем хăйсене кăтартма пултарнă. Çакă вăл тренерсен ăсталăхĕпе кăна мар, ачасене тренировкăсем ирттерме условисем туса панипе те çыхăннă. Виталий Трофимов тренер акă Санарпуçĕнчи вăтам шкул тата Çĕньял Хапăсри культура çурчĕн ертÿçисем ячĕпе ырă сăмахсем каларĕ. Ахальтен мар, кунта кĕрешÿ секцийĕ ĕçлеме пуçланăранпа вăхăт нумай та иртмерĕ, хĕрсемпе каччăсем результатсемпе савăнтарчĕç те.