00:00 06 февраля 2013 г.
Сталинград патĕнчи çапăçусенче нимĕç фашисчĕсене çĕнтернĕренпе 70 çул çитнине халалласа районта культура мероприятийĕсем çеç мар, спорт ăмăртăвĕсем те пулчĕç. Иртнĕ эрне кун çак ятпа «Химик» стадионта çамрăк биатлонистсем тупăшрĕç.
Николай Петров уйрăм предприниматель тăратнă 30 комплект парнене çĕнсе илессишĕн вунă шкулти вун виçĕ команда ăмăртрĕ. Ярмушка, Туçи Çармăс тата Çĕрпел шкулĕсем икшер команда тăратнă.
Çĕнтерĕве алла илме çăмăлах пулмарĕ. Эстафета – командăра виçĕ каччă, икĕ хĕр – винтовкăран перессине тата икĕ километр йĕлтĕр чупăвне пĕрлештерчĕ. Хăвăрттисем теприсем юлашки çаврăма старта тин тухнă вăхăтра финиша та çитрĕç. Çапла 1995–1997 çулсенче çуралнисем хушшинче пĕрремĕш вырăна Кульцав шкулĕн команди тивĕçрĕ. Иккĕмĕш вырăнта Хапăс шкулĕн, виççĕмĕшĕнче Вăрнарти 29-мĕш училище командисем.
Кĕçĕнреххисен ушкăнĕнче Ярмушка шкулĕн икĕ команди те призлă вырăнсене лекрĕ, вĕсем – ылтăн тата бронза призерсем. Иккĕмĕш вырăнта – Туçи Çармăс шкулĕ.
Ăмăрту пуçланиччен ачасене район администрацийĕн пуçлăхĕ Леонид Николаев, ăмăрту спонсорĕ Николай Петров саламларĕç. Эстафетăна «Совет офицерĕсен союзĕ» районти организаципе пĕрлешсе ирттернĕрен, унта Шупашкартан килнĕ хăнасене курни те ăнсăртран пулмарĕ. «Пограничниксен юлташлăхĕ» республикăри обществăлла организацийĕн правлени пуçлăхĕ Андрей Балыков тата унăн заместителĕ Анатолий Шорников та командăсемшĕн хавхалантару, ырă тĕслĕх пулчĕç.