00:00 04 февраля 2013 г.
Фитнес-аэробика енĕпе районăн «НЕКСТ» пĕрлештернĕ команди республикăри конкурсра пĕрремĕш вырăн йышăннă
Фитнес-аэробика – спортăн «çамрăк» тĕсĕ. Апла пулин те вăл районта – малтан «Химик» спорт клубра, юлашки çулсенче шкулсенче те – анлă сарăлчĕ. Ку енĕпе Вăрнарта та халĕ çулсеренех конкурс иртет. Çавăн пекех ачасен командисем республикăра иртекен спорт ташшин фестивалĕсене те хастар хутшăнаççĕ. Иртнĕ çул вĕçĕнче зонăри турнирта тĕрлĕ ÿсĕмре районăн тăватă команди те çĕнтерÿçĕсем пулса тăнăччĕ, республикăна тухма тивĕç çĕнсе илнĕччĕ.
Хăйсем Чăваш енре те чи лайăххисем пулнине çирĕплетсе пачĕç ачасем. Туçи Мăратри «Шалунишки» (ертÿçи Ирина Малова) тата Çĕрпелти «Карамельки» (ертÿçи Надежда Андреева) Чăваш ен Пуçлăхĕн Кубокĕшĕн пыракан шкул ачисен XV республика спартакиадинче финала тухнă.
Çак кунсенче Вăрнарти 2-мĕш, Çĕрпелти тата Хапăсри шкулсенче вĕренекенсен пĕрлештернĕ «НЕКСТ» команди Чăваш Республикин первенствинче 11–13 çулсенчисен ушкăнĕнче пĕрремĕш вырăн йышăннă, Кубока, медальсене тивĕçнĕ. Хĕрпĕрчисем «Химик» спорт клубĕн тренерĕ Елена Валерьяновна Аликова патĕнче вĕренеççĕ.