00:00 24 декабря 2012 г.
Хуçалăхсем хушшинчи «Вурнарская» организаци тăлăх ачасене Çĕнĕ çул парни турĕ – Зеленăй тăкăрлăкри 21 хваттерлĕ 8-мĕш çурта вĕсемшĕнех пысăк хăвăртлăхпа çĕклесе пĕтерчĕ. Патшалăх программипе килĕшÿллĕн çĕнĕ хваттерсен уççисене ашшĕ-амăшĕсĕр юлнă вунă çамрăк тивĕçрĕç: Михаил Кузьмин, Виктория Ефремова, пĕр тăван Аннăпа Елена Семеновасем, пиччĕшĕпе йăмăкĕ Линăпа Алексей Беловсем, Оксана Кормушкина, Евгений Иванов, Николай Плеханов тата Андрей Иванов.
Савăнăçлă самантпа саламланă май, район администрацийĕн пуçлăхĕ Леонид Николаев çамрăксене çĕршывăн тивĕçлĕ гражданĕсем пулма, çемьеленме, ача-пăча çуратса ÿстерме ăнăçу сунчĕ, тирпейлĕ пулма, çурта-территорие тасалăхра тытма ыйтрĕ.
Ку тăлăх ачасене хваттерпе тивĕçтернĕ пĕрремĕш тĕслĕх мар, çулла юнашар 7-мĕш çуртра çиччĕн «çĕнĕ кĕтеслĕ» пулнăччĕ. Асăннă программăпа çавăн пекех Калинино тата Кĕçĕн Кипек ял поселенийĕсенчи тăлăхсене те пурăнмалли кĕтеспе тивĕçтересси ăнăçлă пурнăçланать.
Малашне çамрăксем çак хваттерсене приватизацилеме, сутса пысăкрах лаптăклă хваттер туянма пултараççĕ.
Зеленăй тăкăрлăкри 8-мĕш çуртра çавăн пекех «Кивĕ çурт-йĕр» программăпа виççĕн – Алексей Иванов, Зинаида Иванова тата Леонид Кириллов, «Ял тухтăрĕ» программăпа район тĕп больницин çамрăк врач-хирургĕ Алексей Димитриев та çĕнĕ хваттер уççисене илчĕç.
Вĕсене пурне те Вăрнар хула поселенийĕн пуçлăхĕн тивĕçĕсене пурнăçласа пыракан Анатолий Старовойт, «Вурнарская» МСО ертÿçи Иван Сандомиров саламларĕç.