00:00 24 декабря 2012 г.
Энергетика промышленноçĕн ĕçченĕсем, Раççей экономика аталанăвне çав тери сумлă тÿпе хывакансем, паян хăйсен профессилле уявне паллă тăваççĕ
Электроэнергетика – Вăрнар экономикин чи кирлĕ отраслĕсенчен пĕри, унăн кашни звеновĕн тăнăçлă ĕçĕнчен районăн социаллă пурнăçĕпе экономика аталанăвĕн ăнăçлăхĕ килет. Шăпах ку отрасльте тимлекенсен тăрăшулăхĕпе ĕçченлĕхне пула пирĕн килсемпе хваттерсене, ĕç вырăнĕсене чи кирлĕ хăтлăх – çутă – пырса тăрать, унпа пĕрле – ăшă та.
«Энергостроймонтаж» тулли мар яваплă общество вун ултă çул кал-кал ĕçлесе пырать. Предприяти 1996 çулхи июлĕн 25-мĕшĕнче ĕçлеме тытăннă – ăна поселока электричествăпа тивĕçтерме тата электричество сечĕсене пăхса тăма йĕркеленĕ. 1999 çулта предприяти «Вăрнарти электричество сечĕсем» ятпа ĕçлеме тытăннă, кăçалхи январьтен «Энергостроймонтаж» ятпа ĕçлет.
Паян тулли мар яваплă общество ĕçченĕсем поселок хуçалăхне электричествăпа тивĕçтернисĕр пуçне сывлăшри тата кабельлĕ электричество сечĕсене, тулашри çутă установкисене, пайласа яракан пунктсене пăхса тăраççĕ, юсаççĕ, тухăçлă ĕçлеттереççĕ, модернизацилессипе тимлеççĕ.
«Энергостроймонтаж» ертÿçисем тивĕçтерÿсен пахалăхне ÿстерессине пысăк тимлĕх уйăраççĕ. Потребительсене тивĕçтерекен электричество энергине сертификацилессипе нумай ĕç тунă. Тĕплĕ тата вак-тĕвек юсав ĕçĕсем кирлĕ пек пурнăçланса пыраççĕ. Хальхи вăхăтра коллектив поселокра электричество сечĕсем туртас тата вĕсене реконструкцилес енĕпе 2012–2016 çулсем валли йышăннă программăна пурнăçа кĕртессипе тимлет.
Тивĕçтерÿсен пахалăхĕ чи малтанах тĕп производство персоналĕнчен – электромонтерсенчен – нумай килет. Предприятире ку енĕпе кулянмалли çук, коллектива ăста, пултаруллă, хăйсен ĕçне пĕлекен пысăк квалификациллĕ çынсем чăмăртаннă. Лев Лукин, Федор Васильев, Анатолий Сергеев, Геннадий Иванов, Александр Павлов халăх ырлăхĕшĕн предприяти йĕркеленнĕренпех тăрăшаççĕ, хăйсен ăсталăхне, профессионализмне ыттисене вĕрентсе пыраççĕ.
Предприяти администрацийĕ çамрăк кадрсене ĕçе явăçтарассине, вĕсене ĕç тĕлне вĕрентессине те пысăк тимлĕх уйăрнă.
Çитĕнÿллĕ ĕçре предприяти ертÿçин малашлăхлă çивĕч политики, çирĕп алли тата яваплăха мала хуни курăнать. Рифкат Шамдинович Киметов, «Энергостроймонтаж» пуçĕнче çичĕ çул тăраканскер, тĕвĕçтерÿ пахалăхне, производство калăпăшне ÿстерессипе хытă тимлет. Инвестици программипе килĕшÿллĕн кăçал акă сывлăшри линисене 4,8 километр çĕнетсе улăштарнă. Вĕсене çĕнĕ технологисемпе – сетьре электроэнергие перекетлекен ресурссемпе – пурнăçланă. Çавăн пекех виçĕ трансформатор подстанцине юсанă. Çакă пĕтĕмпех Вăрнар поселокне çутă çитерес ĕçе лайăхлатнипе çыхăннă.
Çавăн пекех çутă вăрлакансемпе кĕрешессипе пысăк ĕç пырать. Çавна май кивĕ электросчетчиксене электронлипе нумай улăштарнă.
Коллектив хăйĕн умне энерготытăм тухăçлăхне пысăклатассипе, энерги парса тăнă чухнехи çухатусене чакарассипе, производство энерги тăкакланассин калăпăшне чакарассипе çыхăннă тĕллевсене чыслăн пурнăçлать, çĕнĕ проектсене пурнăçа кĕртсе пыма тăрăшать, 2013 çула пысăк ĕмĕт-тĕллевсемпе кĕрет.
С.ЧИКМЯКОВА.