00:00 20 декабря 2012 г.
Шăмат кун районăн пĕрлештернĕ волейбол команди республикăри «Урожай» физкультурăпа спорт обществин Кубокне çĕнсе илнĕ
Вăрнарсем ку турнирта пĕрремĕш хут мар. Чемпион ятне вĕсем унчченхи çул та тивĕçнĕччĕ. Паллах, урăх йышпа. Хальхинче район чысне Вадим Кириллов, Николай Прокопьев (Вăрнар), Андрей Алексеев, Артем Степанов, Игорь Шашков (Çĕрпел), Михаил Сильвестров (Кульцав) хÿтĕленĕ. Тренерĕ – Владимир Иванович Иванов.
Шел, хĕрарăмсен команди финала тухайман.
Çак кунах Вăрнарти физкультурăпа спорт комплексĕнче те волейбол турнирĕ иртрĕ. Унта пиллĕкмĕш çул ĕнтĕ вырăнти хăй тытăмлăх органĕсенче ĕçлекенсен пилĕк команди тупăшать. Тÿрех калам, «Туслăх» Кубокне кăçал та Вăрнар район администрацийĕн команди çĕнсе илчĕ. Виççĕмĕш хут.
Республикăри чи вăйлă командăсем хутшăннăран вăйăсем çав тери хĕрÿ иртрĕç. Çакна сетсенчи очкосен шучĕсем те аван çирĕплетрĕç – командăсем пĕр-пĕрне ниепле те парăнасшăн пулмарĕç.
Вăрнарсен команди пĕр-пĕрне туйса выляни аван сисĕнчĕ, яланхиллех вĕсем кашни очкошăн пĕтĕм вăя хыврĕç. Çак кун район администрацийĕн пуçлăхĕ Леонид Николаев та ĕç тумне спорт формипе улăштарчĕ, хăйĕн ĕçченĕсемпе пĕрле команда чысне хÿтĕлерĕ.
«Туслăх» Кубокĕшĕн вăрнарсемпе пĕрле яланхиллех Чăваш ен Пуçлăхĕн администрацийĕн, Шупашкарти «Лира», Канаш район администрацийĕн тата Сĕнтĕрвăрринчи 11-мĕш ПУ командисем тупăшрĕç.
Çĕнтерÿçĕ-командăсем «Надежный», «Рабица», «Радуга» лавккасен, Вăрнар тата Калинино райповĕсен тата Владимир Тикинев предприниматель парнисене тивĕçрĕç.