00:00 20 декабря 2012 г.
Декабрĕн 8-мĕшĕнче Мускаври Тăван çĕршывăн Аслă вăрçин Тĕп музейĕнче Мускав Правительстви, Çемье тата çамрăксен политикин департаменчĕ, социаллă воспитани енĕпе ĕçлекен наукăпа методика центрĕ « Ачасемпе çамрăксене гражданла патриотизм воспитанийĕ парасси» темăпа наукăпа практика конференцине ирттернĕ. Ăна Мускав çывăхĕнчи çапăçусенче Хĕрлĕ Çар нимĕç фашисчĕсене хирĕç çĕкленнĕ контрнаступлени пуçланнăранпа 71 çул çитнине тата Тăван çĕршыв Геройĕсен кунне халалланă.
Конференцие Чăваш енрен тухнă офицерсен Мускаври «Сыны Отечества» юлташлăхĕн делегацийĕ те – Э.В.Васильев, В.М.Ильин тата А.Г.Шашков – хутшăннă.
Конференци умĕн темиçе видеофильм кăтартнă, вăл шутра – тĕслĕх вырăнне Калининăри вăтам шкулти кадетсем Пĕтĕм Раççейри «Марш победителям!» стройпа юрăсен смотрĕнче кăтартуллă çĕнтернине те. Ентешĕмĕр Эрик Васильевич Васильев полковник пухăннисем – ветеран организацийĕсен, çарпа патриотзм пĕрлешĕвĕсен ертÿçисем, вăрçă ветеранĕсем – ачасен конкурссенчи хусканăвĕ-уттипе, хуравĕсемпе, пултарулăхĕпе мăнаçланса тĕлĕннине пĕлтерчĕ.
Конференцире Эрик Васильевича хăйне те çитĕнекен ăрăва патриотла воспитани парассине пысăк тÿпе хывнăшăн, Тăван çĕршыв службинче тăнăшăн Дипломпа чысланă.