00:00 12 декабря 2012 г.
Пилĕк ылтăн, çичĕ кĕмĕл, вун пилĕк бронза – районти кĕрешÿçĕсем шăмат кунхи турнирта çĕнсе илнĕ медальсен шучĕ ытти командăсенчен чи нумаййи пулчĕ
Çак турнир çамрăк спортсменсемпе тренерсемшĕн çеç мар, хăнасемшĕн, куракансемшĕн те пысăк кăмăл-туйăмпа асра юлчĕ. Районта ирĕклĕ кĕрешÿ спортне пуçарса яракана Владимир Данилович Егорова асăнса ирттернĕскер, кĕрешÿçĕсене пĕр тĕвве тĕлĕнмелле йышлă пуçтарчĕ – вун пилĕк команда, 234 спортсмен.
Хамăр районтан кавир çине Санарпуçĕнчи, Мăн Явăшри, Кĕçĕн Кипекри, Вăрнарти 1-мĕшпе 2-мĕш шкулсенче вĕренекенсем тухрĕç. Вăрнар çĕрĕ çавăн пекех Патăрьел, Красноармейски, Хĕрлĕ Чутай, Канаш, Сĕнтĕрвăрри районĕсенчи, Канаш тата Шупашкар хулисенчи спортсменсене йышăнчĕ. Ку çеç те мар – саккăрмĕш хут республика шайĕпе иртекен турнира Ульяновск, Чулхула облаçĕсен тата Хусан командисем те килсе çитрĕç.
Республикăн кĕрешÿ тытăмне аталантарассине палăрмалла тÿпе хывакансем – çитĕнекен ăрăва сывă пурнăç йĕркипе туслаштаракансем Виталий Трофимов, Владимир Семенов, район администрацийĕн ятарлă программăсен пайĕн пуçлăхĕ Алексей Владимиров çамрăксене саламланă май, çакнашкал турнирсем ăсталăха ÿстернине, туслăха çирĕплетнине, çĕнтерÿ патне ăнтăлма пулăшнине палăртрĕç.
Хаклă хăнасенчен пĕри – Раççей Аслă сучĕн судйи Вячеслав Ксенофонтович Яковлев, хăй вăхăтĕнче пирĕн районта ĕçленĕскер, кĕрешÿ ăсталăхне Вăрнарти спорт шкулĕнче туптанăскер, ачасене сывă пурнăç йĕркине суйласа илнишĕн мухтарĕ, вĕсем ыттисемшĕн тĕслĕх пулнине каларĕ.
Паллах, чи хумхануллă самант тытăçусем вăхăтĕнче пулчĕ. Вĕсем харăсах икĕ кавир çинче сарăлчĕç. Арçын ачасем – вунă, хĕрачасем ултă виçе категорийĕнче тупăшрĕç. Куракансем те йышлă пулнăран физкультурăпа спорт комплексĕн залĕ кĕрлесе кăна тăчĕ, кĕрешĕве тухакансене хавхалантарни мĕн турнир вĕçлениччен те шăпланмарĕ.
Çĕнтерÿ пьедесталĕн чи çÿллĕ пусми çине вун улттăн хăпарма тивĕçрĕç, вĕсенчен пиллĕкĕшĕ – Вăрнар кĕрешÿçисем: Денис Федоров, Леонардо Семенов, Никита Львов, Евгений Смирнов, Настя Максимова.
Кĕмĕл медале Малик Кураков, Дима Мошкин, Никита Сорокин, Дима Прокопьев, Кристина Ларионова (Вăрнар), Анна Яковлева, Екатерина Кошкина (Мăн Явăш) тивĕçрĕç.
Алексей Тимофеев, Денис Краснов, Дмитрий Львов, Дима Анисимов, Александр Кадыков, Владимир Павлов, Антон Павлов, Антон Сантимер, Милена Федорова, Екатерина Иголкина (Вăрнар), Руслан Кириллов, Дарья Никандрова, Диана Яковлева, Линда Журавлева, Надя Краснова (Санарпуç), Аня Миронова (Мăн Явăш) – бронза призерсем.
Вăрнарта хĕрсе ăмăрту пынă вăхăтра Пăваяль хĕрачи Настя Иванова, Юрий Львов тренер патĕнче ирĕклĕ кĕрешÿ ăсталăхне алла илнĕскер, Мускав облаçĕнчи Чехов хулинче иртнĕ Раççей первенствинче Чăваш ен чысне хÿтĕленĕ. 49 килограмлă виçе категорийĕнче бронза медаль çĕнсе илнĕ. Пултаруллă хĕрача халĕ Шупашкарти олимп резервисен училищинче вĕренет.