00:00 03 декабря 2012 г.
Районти организаци тĕрлĕ категорири 310 инвалида пĕрлештерет. Пĕтĕмпе вара сывлăх енчен айăпланнă çынсем районта 2359-ăн, вăл шутра I ушкăнри инвалидсем 467 çын, II ушкăнрисем – 846-ăн, III ушкăнрисем – 1046 çын.
Кăçал Пĕтĕм тĕнчери инвалидсен кунĕпе çыхăннă мероприятисене ял поселенийĕсенче ирттерме палăртнă.
Укçа-тенкĕ енчен çăмăл мар пулин те, инвалидсен районти организацийĕ палăртнă задачăсене яланах тĕллевлĕ пурнăçлать. Тĕп ĕç, паллах, – сусăр çынсен интересĕсемпе прависене хÿтĕлесси. Ку тĕлĕшпе район прокуратурипе пĕрле инвалидсене пурăнма-çÿреме условисем туса парас тĕлĕшпе 14 тĕрĕслев иртернĕ. Çынсем асăрханă пулĕ, чылай çурт – шкул, почта, район администрацийĕ, банксем, аптекăсем, больница, чиркÿ, суту-илÿ точкисем – умĕнче пандуссем туса лартрĕç.
Район администрацийĕ пулăшнипе кашни ял поселенине инвалидсене коляскăсемпе çÿреме кирлĕ условисем туса парассипе нормативсене çитертĕмĕр.
Кăçал çавăн пекех «Шанс» пасар территорийĕнче инвалидсене валли ятарлă тăрăллă кану вырăнĕ туса пама май килчĕ.
Физкультурăпа спорт комплексне инвалидсем ирĕклĕнех çÿреме пултараççĕ, кунта вĕсем пауэрлифтинг, дартс, сĕтел çи теннис, кире пуканĕн спорчĕ, волейбол енĕпе занятисене çÿреççĕ. Тренерсем инвалидсене пулăшсах пыраççĕ. Анчах та тĕрĕслев вăхăтĕнче çитменлĕх тупма тÿр килчĕ – кунта сусăррисене туалета çÿреме кансĕр.
Остеопороза асăрхаттарассипе, сиплессипе специалистсене чĕнсе районти тĕп библиотекăра вĕренÿ йĕркеленĕ. Муркаш районĕнче иртнĕ пулăç кунне, Элĕк районĕнче иртнĕ спорт мероприятине инвалидсем хаваспах хутшăнчĕç. Çĕрпÿ районĕнче экскурсире пулни нумайлăха асра юлчĕ.
Мероприятисене ирттерме, тухса çÿреме пулăшнăшăн спонсорсене – «Август» Фирмăн Вăрнарти филиалне (директорĕ В.В.Свешников), «Вурнарская» МСО-на (И.А.Сандомиров), «Сортсемовощ» АХО-не (В.В.Чумаков), предпринимательсене – пысăк тав.
Халăха ĕçпе тивĕçтерекен центр урлă 23 инвалида ĕçе вырнаçтарма, икĕ инвалида специализациленĕ ĕç вырăнĕпе тивĕçтерме май килчĕ. 30 çын санаторипе курорт сиплевĕ валли путевкăсем илнĕ. Икĕ инвалида пурăнмалли çурт-йĕрпе тивĕçтернĕ.