00:00 07 ноября 2012 г.
Иртнĕ эрне кун Шупашкарти оперăпа балет театрĕнче ял хуçалăхĕпе тирпейлекен промышленноçра тăрăшакансен професси уявĕ пулнă. Унта Вăрнар район администрацийĕн пуçлăхĕ Леонид Николаев ертсе пыракан делегаци те хутшăннă. Агропромышленность комплексне аталантарассипе вăй хуракансене, ĕç ветеранĕсене Чăваш ен Пуçлăхĕ Михаил Игнатьев, Чăваш Республикин Патшалăх Канашĕн Председателĕ Юрий Попов, Чăваш Республикин Министрсен Кабинечĕн Председателĕн заместителĕ – ял хуçалăх министрĕ Сергей Павлов тата ыттисем саламланă.
Уявра кăçалхи ял хуçалăх çулталăкĕнче мала тухнă предприяти-организацисене, коллективсене, ĕç çыннисене чысланă. «2008 – 2015 çулсенче Чăваш Республикин агропромышленность комплексне аталантарасси тата ял хуçалăх продукцине, чĕр таварăн тата апат-çимĕçĕн рынокне йĕркелесе тăрасси» республика программине пурнăçа кĕртессипе тухăçлă тимленĕшĕн пирĕн район Чăваш енĕн тĕп зонинчи районсем хушшинче пĕрремĕш вырăна тухнă, диплома тивĕçнĕ.
Чăваш ен Пуçлăхĕ чи маттур ĕçченсене патшалăх наградисемпе чысланă. Карл Маркс ячĕллĕ кооперативри Эдуард Абрамов «Чăваш Республикин тава тивĕçлĕ механизаторĕ» хисеплĕ ята тивĕçнĕ.