00:00 10 октября 2012 г.
Вăрнарти 1-мĕш вăтам шкулта вĕренекен çамрăк шашка ăстисем Ирина Ивановапа Танзалия Замалиева Сочире иртнĕ тĕнче первенствинчен çĕнтерÿпе таврăнчĕç: Ирина – кĕмĕл, Танзалия бронза медальсемпе
Григорий Иванович Степановăн вĕренекенĕсем сумлă ăмăртура çулсеренех результатсене çĕнетсе пыраççĕ. Ирина Иванова – республикăн нумай хутчен чемпионĕ – акă курортлă хулара Чăваш ен чысне пĕрре мар хÿтĕленĕ. 2008 çулта Адлерта иртнĕ «Тĕлĕнтермĕш шашкăсенче» вăл 21-мĕш пулнăччĕ. Тепĕр çулхине – 17-мĕш. 2010-мĕшĕнче вара Европа первенствинче вырăс шашкипе çиччĕмĕш, пĕлтĕр пиллĕкмĕш вырăна хăпарнăччĕ. Кăçал ав результат тата лайăхрах – иккĕмĕш вырăн!
Пултаруллă хĕрача республикăра лидерствăна алăран ямасть. Шкул ачисен команди йышĕпе «Тĕлĕнтермĕш шашкăсен» республикăри ăмăртăвĕнче пилĕк çул чемпион, 2007 çулта – кĕмĕл призер. Шкул ачисен спартакиадинче тăваттăмĕш хут – çĕнтерÿçĕсем.
Хĕрарăмсем хушшинче иртекен Чăваш ен первенствин чи çамрăк участникĕ (шкул ачисенчен пĕччен кăна) икĕ çул харăс кĕмĕл призер пулчĕ. Арçын ачасемпе хĕрачасем хушшинчи Чăваш ен первенствин тăватă хутчен чемпионĕ, пĕр хутчен – кĕмĕл призер.
Кăçал Сочире иртнĕ Пĕтĕм тĕнчери XXI первенствинче Иринăпа вылякансем пурте спорт мастерĕн кандидачĕсем пулнă, вăл кăна – I разрядлă шашка ăсти. Вун икĕ партирен И.Иванова иккĕшне çеç выляса янă. Хăй те спорт мастерĕн кандидачĕн нормативне пурнăçланă.
Тантăшĕсен Иринăпа танлашмалли пур: вĕренÿ отличникĕ, обществăлла пурнăç хастарĕ, журналистикăпа кăсăкланать.
Танзалия Замалиеван çитĕнĕвĕпе те тĕлĕнмесĕр иртме çук. «Çăлтăрлă» çулне халех хыврĕ темелле – 1-мĕш класс хĕрачин пĕрремĕш ăмăртăвĕ тĕнче шайĕнче иртнĕ-çке! Пĕрремĕшĕнчех – чаплă результат. Çитменнине, участниксенчен чи кĕçĕнни пулнă. Уйрăмах Мускаври Вера Горбачевапа, спорт мастерĕн кандидачĕпе, вăйă хĕрÿ иртнĕ. Юлашкинчен йăнăш утăм туман пулсан-и – пĕрремĕш те пулма пултарнă. Челябинск хĕрачине, выляса яма пуçланипе макăрма тытăннăскере, хăйĕн çĕнтерÿллĕ лару-тăрăвне пăхмасăр хĕрхенсе çур очко «парнелемен» пулсан тата;.. – иккĕмĕш пулатчĕ.
Çапах та пĕчĕк хĕр пĕрчи кулянмасть. Икĕ çул каялла кăна шашкăпа туслашнăскерĕн, пуçламăш турниртах лайăх результат кăтартнăскерĕн, малашлăхĕ пысăк.
Вăрнар районĕнчен тĕнче турнирне çавăн пекех Вăрманкасри шкулта вĕренекен Егор Кузьмин та хутшăннă. Унăн та результачĕ япăх мар – тăххăрмĕш вырăн.