00:00 12 мая 2012 г.
«Химик-Август» Аслă Çĕнтерÿ кунĕнче тунă çитĕнĕвне, паллах, вăрçă паттăрĕсене халалларĕ
Кăçалхипе çиччĕмĕш хут иртекен çак турнирта Кубок вăрнарсене виççĕмĕш хут çаврăнса çитрĕ. 2007-мĕшĕнче ăна вăл Етĕрнери «Рубин» командăран, 2008-мĕшĕнче – Шупашкарти «Волгăран» çĕнсе илнĕччĕ. Пĕрремĕш çулхине, шел, финалта «Крылья» футбол клубĕ унран вăйлăрах пулчĕ. 2010-мĕшĕнче Кубок çĕмĕрлесен аллинче ялкăшрĕ. Халĕ ак вăл каллех – «Химик-Августра».
Финалта химиксем йĕпреçсемпе тĕл пулнă. Çак икĕ команда аслă дивизионри вăйăсен финалĕнче пĕрремĕш мар тупăшать. Пĕлтĕр хамăр стадионта акă вĕсем Чăваш Республикин чемпионачĕн юлашки вăййинче хĕрÿ вылярĕç – юлашки самантра вăрнарсем кÿршĕ район футболисчĕсенчен çĕнтерĕве «туртса илме» пултарчĕçех. Халĕ те ăнтăлупа тĕлĕнтернĕ. Тĕп вăйăсем никам çĕнтерейменнипе (1:1 шутпа) вĕçленнĕ. Пенальтипе вара «Химик-Август» шута пиллĕке çитернĕ, йĕпреçсен – виçĕ гол кăна.
«Химик-Август» командăн тренерĕсемпе ертÿçисене саламланипе пĕрлех çакна та аса илтермелле. Паян ку командăн аллинче куçса çÿрекен виçĕ Кубок – Аслă Çĕнтерÿ кунĕнче çĕнсе илнисĕр пуçне Чăваш Республикин чемпионачĕн тата Чăваш ен Кубокĕсем. Тăваттăмĕшĕ – Чăваш ен чемпионатĕнче виçĕ çул харăс çĕнсе илни – заводăн музейĕнче яланлăхах упранать.