00:00 02 мая 2012 г.
Вĕрентÿ учрежденийĕсенчи воспитани ĕçĕ-хĕлĕ енĕпе ирттернĕ Пĕтĕм Раççейри конкурса пĕтĕмлетнĕ – Вăрнарти 1-мĕш вăтам шкул унта виççĕмĕш вырăн йышăннă
Çак конкурс иртнĕ çулхи кĕркунне старт илчĕ. И.Н.Никифоров ячĕллĕ шкулăн конкурс ĕçĕ районта çĕнтерÿçĕ пулса тăнăччĕ, регион тапхăрĕнче II степеньлĕ диплома тивĕçнĕччĕ.
Проектра асăннă шкулта воспитани ĕç-хĕлĕ епле пурнăçланнине – ачасен ăс-тăнĕпе пултарулăхне тĕрлĕ мероприятисем урлă аталантарасси, вĕсене уйрăмах теветкеллĕх ушкăнĕнчи ачасене хутшăнтарасси, яваплă ĕçе ашшĕ-амăшне явăçтарасси тата ытти те – тĕплĕн çырса кăтартнă.
Иртнĕ эрнере Раççей Вĕрентÿпе наука министерствин дипломне тивĕçнĕ ятпа ĕçтешĕсем конкурс ĕçĕн авторĕсене – директорăн воспитани енĕпе ĕçлекен заместительне Галина Назарована, кĕçĕн классен учительне Елена Гнилушинана тата информатика учительне Ольга Птицынана – саламларĕç.