00:00 05 марта 2012 г.
Вăрнар районĕ физкультурăпа сывлăха çирĕплетес тата массăллă спорт ĕçĕсен 2011 çул кăтартăвĕсемпе республикăра пĕрремĕш вырăн йышăннă, Кубока тивĕçнĕ
Ку çĕнтерÿ патне вăрнарсем темиçе çул ăнтăлчĕç. Пĕр хутчен – кĕмĕл (2006 ç.), виçĕ хутчен бронза (2004, 2009, 2010 ç.ç.) призерсем те пулнăччĕ.
Чăн та, иртнĕ çул районти мĕн пур физкультура активĕ тăрăшса ĕçлерĕ. Вăрнар район спортсменĕсем тĕрлĕ шайри ăмăртусенче парăнтарчĕç. Чи асра юлни, паллах, – Екатерина Горбунова çăмăл атлетпа Вячеслав Ластухин йывăр атлет Пĕтĕм тĕнчери Универсиадăра çĕнтерÿçĕсен йышне лекни. Полиатлонистсем – Галина Павлова, Александр Политов, Сергей Политов, Александр Созонов çамрăксем республика командишĕн Раççейре кăтартуллă ăмăртаççĕ. А.Политов акă Ухта хулинче иртнĕ ăмăртура Раççей спорт мастерĕн нормативне тултарма пултарчĕ.
Нормативсем тенĕрен, çитес вăхăтра мастерсен йышĕ татах ÿсмелле – Денис Тимофеев ăна кире пуканĕ йăтассипе, Андрей Львов спорт туризмĕнче пурнăçланă. Кире пуканĕ йăтассипех Çăлкас Кăкшăмри Александр Ефимов спорт мастерĕн кандидачĕн результатне кăтартма пултарнă. 35 спортсмен 1-мĕш разрядниксем пулса тăнă.
Ытти уйрăм ятсене асăнас пулсан Шĕнер Ишекри Семен Семенов, Аçăмçырминчи Татьяна Ефимова çăмăл атлетикăра «çăлтăрлă» çулпа пыраççĕ. Пултаруллă çамрăксем халĕ иккĕшĕ те Шупашкарти олимп резервисен училищинче ăсталăха ÿстереççĕ.
Шанчăк паракансен йышне çавăн пекех Елена Иванована (Калинино), пĕр тăван Еленăпа Зоя тата Лариса Зайцевасене (Туçи Çармăс), Диана Политована (Кÿстÿмĕр), Иринăпа Валя Тикиневасене (Мăньял Хапăс), Василий Чугунова (Вăрманкас) тата ытти шкул ачисене кĕртмелле.
Кубок вăрнарсене ăнсăртран тивĕçмерĕ. Чăваш Республикин спорт министерствин чылай кăтартăвĕпе (пĕтĕмпе 21) район малтисен ретĕнче. Пĕлтĕр физкультурăпа çывăхланнисен йышĕ ÿснĕ, пĕтĕм халăхăн 1Ÿ3 пайĕ спортпа туслă (3 вырăн). Спорт секцийĕсене, пурăнакан вырăнта спорт занятийĕсене çÿрессипе – 4-мĕш вырăнсенче. Ку йышра ытларахăшĕ – хĕрарăмсем (2 вырăн). Специалистсем пурте ятарлă пĕлÿ илнĕ (1 вырăн). Шкул ачисен 89,9 проценчĕ спортпа туслă (1 вырăн).
Иртнĕ çул Вăрнар спортсменĕсем Хĕллехи ял спорт вăййисен çĕнтерÿçисем пулса тăчĕç. Район – шкул ачисен XIII Спартакиадин бронза призерĕ. Çамрăк шашка ăстисем 4 çул ĕнтĕ çĕнтерĕве алăран ямаççĕ. Волейболпа – иккĕмĕш, ирĕклĕ майпа кĕрешессипе виççĕмĕш вырăнсене йышăннă. Çăмăл атлетикăра, йĕлтĕрпе чупассипе кăтартусем лайăх. Каялла туртаканнисем – баскетбол тата ишесси. Республика ăмăртăвĕсен пĕтĕмĕшле результачĕсемпе 2-мĕш вырăнта.
Çак кăтартура футболистсен (1 вырăн) тÿпи те пысăк. 2011 çулта вĕсем Вăрнар ятне тивĕçлипех çÿле çĕклерĕç. «Химик-Август» аслă дивизионра улттăмĕш хут Чăваш ен Кубокне çĕнсе илчĕ, Чăваш ен чемпионачĕн çĕнтерÿçи пулса тăчĕ. «Химик-Августăн» иккĕмĕш команди те республика чемпионачĕн иккĕмĕш дивизионĕнче çĕнтерчĕ. Ачасем те сезона ăнăçлă вĕçлерĕç – 1-мĕш вырăнпа савăнтарчĕç.
Спорт юхăмне аталантаракансене тав тунă май, районăн тĕп физкультурникĕ, Чăваш Республикин физкультурăпа спортăн тава тивĕçлĕ ĕçченĕ Сергей Политов ахальтен мар ĕнтĕ ку командăсене тытса тăракан «Август» Фирмăн, унăн «Вăрнарти хутăш препаратсен завочĕ» филиалĕн, «Химик» спорт клубĕн ертÿçисемпе ĕçченĕсене – А.Ускова, В.Свешникова, Е.Захарова, А.Строганова, Ю.Агилова, С.Захарова – ăшă сăмахсемпе уйрăммăн асăнчĕ.
Ку предприятире спорт ĕçне чăннипех те çÿле лартнă. Ертÿçĕсем хăйсен ĕçченĕсене сывă пурнăç стильне ырă тĕслĕхпе явăçтараççĕ. Нумаях пулмасть иртнĕ йĕлтĕр чупăвне акă В.Свешников директор хăй те хутшăнчĕ. Çулсерен йышланса пыракан старт химиксем хушшинче те «çăлтăрлă» ятсем çуратрĕ: А.Константинова, Е.Буданова, О.Капитонова, И.Антонова, Л.Яковлева, И.Веденина, О.Илларионова, Е.Федорова, Ю.Романов, А.Захаров, А.Числов, С.Иванов, А.Максимов.
«Гвардеец» спорт клубĕн (ертÿçи Г.Егоров) ĕçĕсем курăмлă. Вырăнсенче спорта аталантарассине çавăн пекех Уравăшри Александр Авакумов чун çимĕçĕ вырăнне хурать. Ялта ăмăртусем йĕркеленисĕр пуçне çывăх вăхăтра вăл спорт площадкисем тăвас ĕмĕтлĕ.
Тав сăмахне тивĕçлисен йышĕнче çавăн пекех Калининăри, Ярмушкари, Туçи Çармăсри, Вăрманкасри, Аçăмçырминчи, Кÿстÿмĕрти, Хапăсри, Çĕрпелти, Вăрнарти 1-мĕшпе 2-мĕш, Чăрăшкас Хирлепри шкулсем, ял хуçалăх техникумĕн тата 29-мĕш професси училищин коллективĕсем. Ярмушка, Ершепуç, Калинино ял поселенийĕсенче спорта аталантарасси пысăк тимлĕхре.
Тепĕр ырă саманта та асăнмасăр иртме çук – республикăн çÿлерех асăннă смотр-конкурсĕнче Вăрнарти физкультурăпа спорт комплексĕ те палăрнă, виççĕмĕш вырăн йышăннă. Ахальтен мар. Ун алăкĕсем яра куна, каçхи тăххăрчченех уçă. Волейбол, баскетбол, мини-футбол, каратэ, ирĕклĕ кĕрешÿ, йывăр атлетика, аэробика, фитнес-аэробика секцийĕсем тухăçлă ĕçлеççĕ. Ачасем валли мĕн пур заняти тÿлевсĕр. Çĕрпелти, Калининăри, Кĕçĕн Кипекри, Пăртасри шкулсенче вĕренекенсем кунта хушма физкультура урокне çÿреççĕ. Предприяти-организацисемпе килĕшÿсем тунă. Уйрăмах хутăш препаратсен завочĕн, налук инспекцийĕн, шалти ĕçсен районти пайĕн, район администрацийĕн, 27-мĕш пушар чаçĕн ĕçченĕсене спорткомплексра час-часах курма пулать.
– Сывă пурнăç йĕркипе çывăхланма условисем тата хавхалантару çеç мар, çынна кÿрекен ырă витĕм те кирлĕ. Ача, сăмахран, ашшĕ-амăшне кура çул суйласа илет. Спортра та çавнашкалах. Район администрацийĕн пуçлăхĕ Леонид Николаев акă спортăн чăн-ăчн тусĕ – волейболла вылять, йĕлтĕрпе ярăнать. Пире ун тĕслĕхĕпе «чирлемесен» намăс та. Спорт – сывă пурнăç формули. Эппин, кашни çыннăн унпа туслашмалла... – тав сăмахĕсемпе пĕрлех палăртрĕ районăн спорт юхăмне аталантарассин пуçĕнче тăракан Сергей Политов.
Палăртмалла, Кубока вăрнарсем канашсенчен пĕр очко ытларахпа выляса илнĕ. Кăçалхи кăтартусемпе ăна урăх района ярас мар тесен спортсменсен çеç мар, пурин те тăрăшмалла, ăмăртусене хутшăнмалла, çĕнтермелле.