00:00 29 февраля 2012 г.
Шупашкарта Д.А.Медведев Президент ертсе пынипе РФ Патшалăх Канашĕн президиумĕн ларăвĕ иртнĕ
Раççей Президенчĕ Дмитрий Медведев Шупашкара килни кунта РФ Патшалăх Канашĕн президиумĕн çĕршывра талантлă ачасемпе çамрăксене патшалăх енчен пулăшмалли мерăсене сÿтсе явассине халалланă ларăвĕ иртнипе çыхăннă. Çавна пула визит программинчи тĕл пулусем те çак темăпах иртнĕ. Дмитрий Анатольевич «ЭКРА» «НПП» ОООра, тĕп хулари 5-мĕш гимназире пулнă, Чăваш ен Пуçлăхĕпе Михаил Игнатьевпа курса калаçнă.
– Тема çĕнĕ мар, – тенĕ ПК президиумĕн ларăвне уçнă май Дмитрий Медведев, – эпир ăна Патшалăх Канашĕнче сÿтсе явнăччĕ. Халĕ ĕç ушкăнĕ çамрăк талантсене тупса палăртмалли концепци хатĕрленĕ, ăна пĕрле сÿтсе явмалла, халăх тишкермелле. Чи кирли – мĕн пур ачана хăйсен пултарулăхне аталантармалли майсем туса парасси. Патшалăхăн çакăн валли условисем йĕркелемелле. Çакă талантсене çĕкленме пулăшĕ, вĕсем вара çĕршыва лидер пулма май парĕç.
Дмитрий Анатольевич шухăшĕпе, шкул ачисем тĕрлĕ олимпиадăна хутшăнса хăйсен пултарулăхне кăтартни пысăк пĕлтерĕшлĕ. Уйрăм тĕллев – талантсемпе ĕçлекен педагогсене хатĕрлесси. Талантсене предпринимательсем тĕрев парассине хавхалантармалла. Çак шухăша çирĕплетме Президент «ЭКРА» тĕслĕхне илсе кăтартнă: унта бакалавриат, магистратура, аспирантура тапхăрĕнчи çамрăксем те ăнăçлă ĕçлеççĕ.
– Талантлă çамрăксемпе ĕçлессипе çыхăннă тимлĕх ÿссе пыни курăнать, – тенĕ Михаил Игнатьев, – эпир çакна туятпăр. Раççей Президенчĕ пултаруллă çамрăксене регионсен, пĕтĕм çĕршыв аталанăвĕн тĕп стратеги ресурсĕ вырăнне хурать.
«Талантсене ятарласа тума çук, анчах вĕсем валли аталанмалли хăтлă условисем йĕркелеме пулать. Ку енĕпе мĕн чухлĕ ытларах ĕçлетпĕр – талантсемпе генисем çавăн чухлĕ ытларах пулĕç», – тенĕ Михаил Игнатьев.
Асăннă енĕпе пысăк ĕç тунине палăртнипе пĕрлех Михаил Васильевич çитменлĕхсем çинче те чарăнса тăнă: ачасене пĕчĕклех пулăшса пымалли тытăм йĕркеленмен, вырăнсенчи бюджетсен майĕсем тĕрлĕрен пулнине кура регионсенче ачасемпе çамрăксене пулăшмалли майсем те тĕрлĕ, талантсене пулăшма укçа уйăрмалли пĕрешкел принципсем çирĕпленмен тата ыт. те. Сĕнÿсенчен пĕри – Федерацин талантсене шырамалли тата пулăшмалли ятарлă фондне йĕркелесси. Çавăн пекех хушма вĕрентĕве РФ субъекчĕсен полномочийĕсен шутне кĕртни те вырăнлă пулмалла.
РФ вĕрентÿ министрĕн Андрей Фурсенкон шухăшĕпе, пултаруллă ачасене конкурс-олимпиадăсенче çĕнтерме пулăшакан вĕрентекенсене грантсемпе хавхалантарни вырăнлă пулмалла, çав грантсен виçине самай пысăк тумалла – 50 пин тенкĕрен пуçласа...
Калаçăва пĕтĕмлетнĕ май, Дмитрий Медведев талантсене пулăшассин пĕлтерĕшĕ пысăкки çинче тепĕр хут чарăнса тăнă. Тивĕçлĕ концепцие тишкермешкĕн вăхăт панă, анчах вăл малашнехи ĕç никĕсĕ пулса тăрасси инçе мар ĕнтĕ – çывăх вăхăтрах йышăнĕç, пурнăçлама тытăнĕç.