00:00 27 февраля 2012 г.
Февралĕн 23-мĕшĕнче Чăваш ен делегацийĕ, вăл шутра «Çĕнтерÿ çулĕ» хаçат ĕçченĕсем те, Мускавра «Çĕршыва хÿтĕлетпĕр!» форума хутшăнчĕç
Тĕп хуламăрăн «Лужники» стадионĕ çĕршывăн пур регионĕнчен тенĕ пек 130 пин çынна пуçтарчĕ. Вĕсене пурне те пĕр тĕллев – Раççей тăнăçлăхĕшĕн кĕрешесси – пĕрлештерчĕ.
Раççей Правительствин Председателĕ Владимир Путин форума хутшăнакансене пурне те çĕршывăн чăн-чăн хÿтĕлевçисемпе танлаштарчĕ. «Эпир кунта Раççее юратни çинчен калама килнĕ. Пирĕн пеккисем – вуншар пин, вуншар миллион çын. Пирĕн шухăшлисем ытларах пулччăр. Эпир Раççей ырлăхĕшĕн ĕçлеме хатĕр», – терĕ вăл.
Владимир Владимирович хальлĕхе çĕршывра çивĕч ыйтусем нумай пулнине палăртрĕ – тĕрĕсмарлăх, танмарлăх, взятка илни, чиновниксен сĕмсĕр ĕçĕсем, чухăнлăх. «Эпĕ çĕршыври кашни çын – пуçлăх-и вăл е ахаль çын – тĕрĕслĕхпе, совеçпе пурăнтăр тесе ĕмĕтленетĕп. Кашни çын телейлĕ пултăр, вăл шанчăкпа пурăнтăр. Анчах та чи кирли – эпир яланах пĕрле пулар! Эпир – çĕнтерÿçĕ- халăх. Пирĕн малашлăха пăхмалла!» – терĕ вăл.
Премьер Михаил Лермонтовăн «Бородино» сăвă йĕркисене ахальтен илсе кăтартмарĕ. Владимир Путин Раççей тăнăçлăхĕшĕн пурне те пĕрлешсе ĕçлеме чĕнчĕ: «Раççейшĕн кĕрешÿ вĕçленмен-ха. Çĕнтерÿ пĕр шухăшлă халăх аллинче пулĕ!..»
Митингра çĕршыври паллă политиксем, паллă обществăлла деятельсем те сăмах каларĕç, Раççей пуласлăхĕшĕн пĕрлешме ыйтрĕç. 130 пин ытла аудиторие çавăн пекех эстрада çăлтăрĕсем те – Денис Майданов, Сергей Трофимов юрăçсем, «А-Студио», «Любэ» ушкăнсем – саламларĕç.
Чăваш ен делегацийĕ йышĕнче массăллă информаци хатĕрĕсен ĕçченĕсемсĕр пуçне общество хастарĕсем, профсоюзсен представителĕсем те пулчĕç. Вăрнар районĕнчен çавăн пекех «Мураты» тата К.Маркс ячĕллĕ хуçалăхсен председателĕсем Геннадий Спиридоновпа Валерий Шумилов хутшăнчĕç.