00:00 24 января 2012 г.
Чăваш патшалăх академи драма театрĕнче Раççей тата Чăваш пичечĕн кунне халалланă уяв иртрĕ. Журналистсемпе полиграфистсене, отрасль ветеранĕсене республика Пуçлăхĕ Михаил Игнатьев саламларĕ
Пухăннисене уяв ячĕпе саламланă май Чăваш ен Пуçлăхĕ влаç массăллă информаци хатĕрĕсемшĕн уçă пулнине, журналистсемпе яланах уççăн, пĕр-пĕрне шанса калаçнине палăртрĕ. Михаил Игнатьев «тăваттăмĕш влаç» Чăваш ен аталанăвне пысăк тÿпе хывни çинчен каларĕ: «Чăн-чăн ăста аллинче сăмахпа калем пархатарлă вăй пулса тăраççĕ. Ăнăçсăр алăра вара вĕсем аркату кÿме пултараççĕ. Сире пысăк профессионализмшăн, яваплăхшăн, ĕçе тÿрĕ кăмăлпа пурнăçланăшăн тав тăватăп». Чăваш ен Пуçлăхĕ массăллă информаци хатĕрĕсен тĕллевĕ влаç органĕсеннипе пĕр килнине палăртрĕ – çынсен пурнăçне лайăхлатма пулăшасси.
Журналистсене ĕçри çитĕнÿсемшĕн патшалăх наградисемпе палăртрĕç. Республика Пуçлăхĕн Тавне Вăрнар районĕн «Çĕнтерÿ çулĕ» хаçатăн тĕп редакторĕ Вячеслав Николаев та тивĕçрĕ. Чăваш ен Пуçлăхĕ ăна çавăн пекех хаклă парнепе – ятран çырнă алă сехечĕпе – чысларĕ.