00:00 23 января 2012 г.
«Çĕнтерÿ çулĕ» хаçат редакцийĕ çирĕплетнĕ мухтавлă ентешĕмĕр Чăваш халăх писателĕ Анатолий Емельянов ячĕллĕ премие кăçал ĕçтешĕмĕр ял пурнăçĕн пайĕн редакторĕ Елена Тикинева тивĕçрĕ
Çамрăк журналистпа халăх писателĕ хушшинче ентешле çыхăну уйрăмах çывăх. Вĕсем иккĕшĕ те Мăньял Хапăсран. Елена Тикинева ачаран хăйсен ялĕнчен тухнă çыравçăн А.Емельяновăн калав-повеçĕсене вуласа ÿснĕ. Кĕнекесенче сăнланнă чылай пулăм тăван ялпа, районпа çыхăннипе, сăнарсем палланă-пĕлнĕ çынсем пулнипе мăнаçланнă. Тен, çакă та ăна литература анинче хăйне тĕрĕслеме хистенĕ.
Унра пултарулăх çăлкуçĕ чăннипех хăватлăн тапса тăрать. Хаçат страницисенче ял хуçалăх, сывлăх сыхлавĕн тематикине тĕплĕн çутатнисĕр пуçне вăл литературăра та ят илчĕ. Малтанах «Пирĕшти» повеçне, унтан «Ăçта юрату, унта çутă» пьесине вулакансем çав тери кăмăлласа йышăнчĕç. Çамрăксен литература творчествин «Çĕнĕ ятсем уçатпăр» иккĕмĕш конкурсĕн дипломанчĕ. 2008 çулта вăл хăйĕн пьесипе республикăри чăваш пьесисен конкурсне хутшăнчĕ. Унăн «Ăçта юрату, унта çутă» хайлавне чăваш театрĕсен сцени çинче выляма сĕнчĕç. 2009 çулта ун пьеси тăрăх К.В.Иванов ячĕллĕ Чăваш академи драма театрĕнче лартма пуçланă «Чун кĕвви» спектаклĕ репертуарти чи паллă постановкăсен йышне кĕрсе çирĕпленчĕ.
Лена вулакансене ялсен пурнăçĕн ярăмĕпе çине-çинех тыткăнлать. Мĕнле пурăнаççĕ аякри ялсенче, ĕçсĕрлĕхрен мĕнле майпа çăлăнаççĕ, çамрăксем мĕнпе кăсăкланаççĕ... – çак тата ытти чылай ыйту çине хурав тупма тăрăшать вăл хăйĕн статйисенче. Ку енĕпех вăл республикăри журналистсем хушшинче йĕркеленĕ «Ял хăй сăнне улăштарать» конкурсра (2010 ç.) çĕнтерÿçĕ пулса тăчĕ. И.Ивник ячĕллĕ литература премийĕн лауреачĕ.