00:00 11 января 2012 г.
Каллех тепĕр çулталăкпа сыв пуллашрăмăр – 2011 çул тăван районăмăр пурнăçĕнче паллă йĕр хăварчĕ, ырă улшăнусем сахал мар пулчĕç.
Вăрнар тăрăхĕн пурнăçне, унăн çыннисен пархатарлă ĕçне-хĕлне, савăнăçĕпе хуйхи-суйхине районти «Çĕнтерÿ çулĕ» хаçат хăйĕн страницисенче пур енлĕн çутатса пырать. Ахальтен мар ăна районăн вĕçĕмсĕр кĕнеки тетпĕр.
2012 çула редакци ĕçченĕсем ырă кăмăл-туйăмпа кĕтсе илеççĕ. Савăнма-хăпартланма сăлтавсем пур. Акă, Çĕнĕ çултан «Çĕнтерÿ çулĕ» 4000 ытла экземплярпа тухса тăрĕ. Тăватă-пилĕк çул каялла унăн тиражĕ икĕ пинрен те сахалтарах пулнине шута илсен, ку питĕ сулмаклă ÿсĕм. Çавăн пекех «Çĕнтерÿ çулĕ» хаçат Раççейре сумлă конкурсра çĕнтерсе «Прессăн ылтăн фончĕ – 2012» Палла тивĕçлĕ пулчĕ. Паянхи журналистсем Вăрнар хаçачĕн унчченхи ырă ятне тавăрассишĕн хăйсенчен мĕн килнине пĕтĕмпех тума тăрăшаççĕ.
Хаçат вулакансем валли тухса тăрать. Унăн содержанине пуянлатма, халăхпа çывăхрах пулма пулăшакансем – обществăлла корреспондентсем, пирĕн шанчăклă туссем. Акă вĕсем: М.А. Васильев, В.А.Иванов, С.А. Шувалов (СерШ), Т.Н.Бондарь (Вăрнар), В.И.Москвин, В.И.Толстов (Мăн Явăш), О.М.Иванова (Австрийская) (Пăртас), В.Д.Скворцов, Г.К.Скворцов, В.Н.Кожанов (Мăньял Хапăс), И.П.Феофанова, З.А.Никифорова (Хирпуç), А.А.Алексеев (Хураçырма), Г.Мясникова (Çĕрпел), М.В.Кудряшова (Вăрманкас), В.П.Воробьев (Уравăш), В.С.Егоров (Элĕк районĕ), Н.Парамонова (Малтикас Ялтăра), С.Уйкас (Уйкас Юнтапа), Е.Ф.Сергеева (инвалидсен районти обществи), Л.В.Спиридонова (район прокуратури), И.Максимова (пушар чаçĕ), А.М.Степанова (загс пайĕ), И.Г.Семенова (пенси фончĕ), Н.Васильев (Вăрнарти професси училищи), М.Г.Александрова (социаллă хÿтлĕх пайĕ), В.П.Кузьмин (Шупашкар) тата ыт. те.
Çавăн пекех эпир «Раççей Почтин» Вăрнарти почтамчĕн (пуçлăхĕ Г.П.Никитин) мĕнпур ĕçченĕсене – çыхăну уйрăмĕсен ертÿçисене, почтальонсене, водительсене, Вăрнар чиркĕвĕн прихучĕн «Георгиевсий листок» хаçатне кăларса тăма пысăк тÿпе хывакан Александр аттене, хаçат çырăнакансем хушшинче ирттерекен лотерея вăййисен ыр кăмăллă спонсорĕсене – А.М.Авруйский, Н.Т.Петров, Е.В.Архипов, В.В.Рыжов, О.А.Романова уйрăм предпринимательсене (Вăрнар), В.Н.Ижелеев фермера (Уйкас Кипек), «Вита» тулли мар яваплă общество директорне С.М.Михайловăна, «Агрокредит» кооператив пуçлăхне И.М.Хамзина, С.А.Владимиров профессора (Выборг), запасри полковника Э.В.Васильева (Мускав) тата ыттисене хаçата пулăшса пынăшăн тав тăватпăр.
Пурне те Çĕнĕ çул тата Раштав уявĕсем ячĕпе чĕререн ăшшăн саламласа ырлăх-сывлăх, иксĕлми телей, ăнăçу сунатпăр. Обществăлла корреспондентсем, çавăн пекех спонсорсем район хаçачĕпе тытакан çыхăну малашне тата çирĕпленессе шанатпăр.
«Çĕнтерÿ çулĕ»
хаçат редакцийĕ.