00:00 02 ноября 2011 г.
Вăрнарти 29-мĕш училище октябрь вĕçĕнче Пĕтĕм Раççейри «Пуçламăш тата вăтам професси вĕрентĕвĕн Раççейри 100 чи лайăх вĕрентÿ учрежденийĕ» конкурсăн лауреачĕ пулса тăнă. Çавăн пекех вăл çак конкурсăн «Çĕнĕлле ĕçлекен чи лайăх училище» номинацийĕнче те çĕнтернĕ. Ун ертÿçи Николай Васильевич Васильев «Çулталăк директорĕ-2011» Хисеплĕ палла тивĕçнĕ
Раççейри вăтам професси паракан вĕрентÿ учрежденийĕсен директорĕсен союзĕ, никама пăхăнман общество канашĕ, Раççей Патшалăх Думин вĕрентÿ енĕпе ĕçлекен комитечĕ, пахалăх тата маркетинг енĕпе ĕçлекен пĕтĕм тĕнчери академи пĕрлешсе йĕркелекен конкурс кăçалхипе улттăмĕш хут иртнĕ. 29-мĕш училище унта иккĕмĕш хут хутшăнчĕ – иккĕшĕнче те палăрчĕ.
Пĕлтĕрхи çĕнтерÿ хыççăн директор вĕрентÿпе воспитани енĕпе пурнăçланакан ĕçсемпе пĕрлех ĕмĕчĕсене те палăртнăччĕ. Калаçура вĕрентÿ пахалăхне пĕтĕм тĕнчери стандарта çитересси уйрăммăн янăранăччĕ. Кăçал училище çак менеджмент паллине те тивĕçме пултарчĕ.
Эрне каяллахи çĕнтерÿре çак критери те хăйĕн тÿпине хыврĕ пулĕ. Унтан та ытла – училищĕре тытса пыракан тĕрĕс политика. Темиçе çуллăха йышăннă аталану программинче вĕренекенсен пур енлĕ аталанăвне, вĕсен ĕç рынокĕнчи тупăшаслăх вăйне ÿстерессине пысăк тимлĕх уйăрнă. Пурнăç ыйтакан профессисене кĕртни те училище малашлăха çирĕп пăхнине çирĕплетет.
Чыслав кăçал та Санкт-Петербургра иртнĕ. Çĕршывăн вун-вун регионĕнчен пуçтарăннă директорсем Раççейри «Вĕрентÿ çинчен» саккун проектне анлăн тишкернĕ. «Çавра сĕтелсен» тĕп ыйтăвĕнче, паллах, аграри тытăмĕ валли специалистсем хатĕрлесси пулнă.
Чăваш енрен чаплă мероприятие Çĕнĕ Шупашкарти 15-мĕш, Шупашкарти 18-мĕш, Канашри 22-мĕш училищĕсем тата Шупашкарти механикăпа технологи колледжĕ те хутшăннă. Николай Васильевич ку тата республикăри ытти училищĕсемпе тачă çыхăнса ĕçленине, час-часах пĕр-пĕрин опычĕпе усă курнине палăртрĕ.
Вăрнар училищи юлашки çулсенче, чăн та, чылай аталанчĕ. Пурлăхпа техника бази пуянланса пырать, вĕренме пур условисем те çителĕклĕ. Уроксем çĕнĕ технологисемпе усă курса иртеççĕ. Планра – вĕренÿ çулĕ вĕçлениччен мĕнпур вĕренÿ пÿлĕмне, мастерскойсене мультмедийлă оборудовани вырнаçтарасси. Ултă кабинетра пур ĕнтĕ вĕсем: ачасем те, преподавательсем те çак оборудовани вĕрентÿ тухăçлăхне ÿстернине палăртаççĕ. Çавăн пекех компьютер класĕсене çĕнĕ ăрури техникăпа пуянлатасшăн. Вĕренÿ кĕнекисене туянма 300 пин ытла тенкĕлĕх заявка панă тата ытти те.
Анчах çивĕч ыйтусем те çук мар. Николай Васильевич кадрсем çителĕксĕррине пăшăрханса пĕлтерчĕ. Кăçал хими, истори предмечĕсемпе, производство вĕрентĕвĕн мастерĕсене çĕнĕ специалистсем килнĕ-ха, çапах та паянхи куна училищĕне инженер-механик, инженер-строитель, производство вĕрентĕвĕ валли техник-строительпе техник-механик питĕ кирлĕ...
С.ЧИКМЯКОВА.