00:00 05 октября 2011 г.
Вăрнарти физкультурăпа спорт комплексĕнче йывăр атлетика енĕпе тĕнче рекордсменне Виктор Андреева асăнса ирттернĕ республика чемпионатĕнче районти виçĕ çамрăк призлă вырăнсене йышăнчĕ
Вĕсем пурте Юрий Агилов тренер патĕнче ăсталăха туптаççĕ. Харпăр хăй виçе категорийĕнче Евгений Туйманкинпа Артем Максимов кĕмĕл, Леонид Дмитриев бронза призерсем пулса тăчĕç.
Паллă ентешĕмĕре, йывăр атлетика енĕпе республикăри пĕрремĕш СССР спорт мастерне, СССР чемпионне, РСФСР спартакиадин çĕнтерÿçине – Айкăш ялĕнче çуралса ÿснĕ Виктор Андреева – халалланă турнир 200-е яхăн çамрăка пуçтарчĕ.
Турнира уçнă май, район пуçлăхĕ Анатолий Кузьмин, В.Андреевăн мăшăрĕ Тамара Михайловна, Малти Ишек ял поселенийĕн пуçлăхĕ Виталий Ананьев, ыттисем Виктор Андреев чунпа та, кĕлеткепе те çав тери вăйлă çын пулнине асăнчĕç. Унăн спорт аталанăвне хывнă тÿпи калама çук пысăк. Вăл – чăтăмлăх, çине тăраслăх тĕслĕхĕ. Пурăннă пулсан, ентеш-пăхаттир 75 çул тултармаллаччĕ. Шăп та 10 çул каялла, 2001 çулта, унăн чĕри ĕмĕрлĕхех тапма чарăннă.
Савăнтарать – аслашшĕн спортри пултарулăхĕ мăнукĕсене те куçнă. Мария йывăр атлетикăна çулталăк каялла кăна килнĕ, апла пулин те çитĕнÿсем тума ĕлкĕрнĕ. Вăл Вăрнарта иртнĕ чемпионатра та хăйĕн виçинче виççĕмĕш вырăн йышăнчĕ. Унччен хĕрача профессионаллă ишевпе кăсăкланнă.
Виктор ку спорт тĕсĕнче – икĕ çул. Кĕлетки йывăрăшне кура (80 кг ытла) арçын ачан ытларах аслисем хушшинче тупăшма тивет. Хăйĕн тантăшĕсем хушшинче ăна çитекен çук.
Çут çанталăк ирĕкĕ ытла та кăсăклă – Виктор каснă-лартнă аслашшĕ. Çакна ăмăрту йĕркелÿçисем те, спортсменсем те палăртрĕç.
Помост çине Раççей, Европа первенствисен, ытти сумлă турнирăн çĕнтерÿçисемпе призерĕсем тухрĕç. Пирĕн районтан унта пĕтĕмпе сакăр каччă хутшăнчĕ. Юрий Агилов республика шайĕнчи ăмăртусем çамрăксене спорта ытларах туртăнма май панине палăртрĕ. Анчах та тĕнче призерне (аса илме: Китайри Универсиадăн кĕмĕл призерĕ) çитĕнтернĕ тренера ашшĕ-амăшĕ ачисене штангăпа айăпланасран хăраса йывăр атлетикăна яма килĕшменни пăшăрхантарать. «Техникăна вĕренмесĕр штанга яхăнне никама та ямастпăр вĕт», – пĕлтерет вăл.
Унăн тимĕр спортĕнче палăрнă вĕренекенсем татах пур – Алексей Кириллов, Артем Максимов. «Тинтерех çÿреме пуçланă çамрăксем çине те шанăç хума май пур. Ку турнирта акă Женя Туйманкинпа Леонид Дмитриев палăрчĕç», – тет Юрий Павлович.
Çĕнтерÿçĕсене валли Виктор Андреевăн портретне сăнланă медальсем кĕтрĕç, вĕсене паллă спортсменсем, судьясем, вăл шутра хамăр районтан тухнă Вячеслав Ластухин атлет та, çакса ячĕç, дипломсемпе чысларĕç.