00:00 05 октября 2011 г.
Иртнĕ эрнери тĕп событисенчен пĕри – Чăваш Республикин футбол чемпионачĕн татса паракан вăййи – «Химик-Август» командăна каллех чап хумĕпе çĕклерĕ
Çак çĕнтерÿ патне «Химик-Август» ултă çул талпăнчĕ, виçĕ хутчен финала тухрĕ пулин те, алăран вĕçертнĕ чемпионствăна (2003, 2005 çулсем) тÿрех тавăрма май килмерĕ. 2006, 2007 тата 2010 çулсенче вăл кĕмĕл призер пулса тăчĕ.
Анчах çак вăхăтра та командăн чапĕ сÿнмерĕ – «Химик-Август» пилĕк çул харăс (2005–2009-мĕшĕсенче) Чăваш ен Кубокне хăй аллинчен ямарĕ, çĕнтерÿ «паллине» яланлăх хăйĕнче хăварма пултарчĕ. Кăçал вара, икĕ çулхи тăхтав хыççăн, çĕнĕ Кубок каллех химиксен аллине куçрĕ.
Чăваш ен Кубокĕшĕн пынă турнира çĕнтерÿллĕн вĕçленĕ хыççăн Чăваш Республикин чемпионачĕн финалне хатĕрленме кăшт вăхăт пулни те «Химик-Августа» самай пулăшрĕ. Шăпа ирĕкĕпе икĕ турнирăн финалĕнче те унăн Йĕпреçри футбол клубĕн командипе тĕл пулма тиврĕ, иккĕшĕнче те вăл кÿршĕллĕ районсенчен вăйлăрах пулнине çирĕплетсе пачĕ.
Вырсарни кун Вăрнарти «Химик» стадион кĕрлесе кăна тăчĕ. Пĕрремĕш таймра ытларах йĕпреçсем тапăнса вылярĕç, химиксен хапхине пĕчĕк тăхтавранах çине-çине икĕ мечĕк тапса кĕртрĕç пулин те вăрнарсем шанăçа çухатмарĕç. Паллах, хумханăва кашнин сăн-питĕнче курма тиврĕ: «Нивушлĕ выляса яраççĕ;..» Иккĕленĕве Артем Бычков сирме пуçларĕ, пĕрремĕш тайм вĕçлениччен пĕр минут маларах вăл хăйсемпе тупăшакансен хапхине мечĕк тапса кĕртрĕ.
Иккĕмĕш таймра химиксем пуçтарăнуллăрах вылярĕç. Темиçе минутранах Алексей Князев шута танлаштарма пултарчĕ. «Химик-Августа» çĕнтерÿçĕ валли çак очко та çитетчĕ, анчах вăл вĕçне çитичченех кĕрешрĕ. Хыççăнах Вăрнар каччи Роман Шалин тепĕр гол кĕртрĕ. Унăн тепĕр шанăç та пурччĕ – шел, Йĕпреç футболистне штраф хунипе тивĕçнĕ пенальтие вăл ăнăçлă тапаймарĕ.
Штраф тенĕрен, шут 3:2-не çитсен йĕпреçсем урса кайнăн выляма тытăнчĕç, пирĕннисене хаяррăн урисенчен тапа-тапа ÿкерчĕç. Çакăншăн пĕр-иккĕшĕ сарă карточкăсене те тивĕçрĕ.
Финал вĕçĕнче арбитр шăхличĕ те савăнăçлăн шăхăрнăн туйăнчĕ. Стадионта пĕр вăхăт хуçаланнă чап-мăнаçлăх хумне сăмахпа çырса пама çук. «Химик-Август» команда начальникĕ Евгений Захаров, мĕн вăйă тăршшĕпех питĕ пăлханнăскер, футбол уйне тухса ташша ячĕ. Футболисчĕсем саламсем йышăннипе пĕрлех ăна, çавăн пекех тренера Герольд Драндрова темиçе хутчен алă çине йăтса çÿле печĕç. «Химик-Август» футбол командин президентне – Вăрнарти хутăш препаратсен завочĕн директорне Владимир Свешникова пурте пыра-пыра çупăрларĕç. «Химик-Август» ялавĕ çил çинче ташланăн вĕлкĕшрĕ.
Республика чемпионачĕн аслă дивизионри вăййисене «Химик-Август» 40 очкопа вĕçлерĕ. 12 тĕл пулăва выляса илнĕ, тăваттăшĕ никам çĕнтерейменнипе вĕçленнĕ, иккĕшне выляса янă. Роман Шалинăн ку турнирта чи нумай гол – пĕтĕмпе 10. Дмитрий Панферовăн – 9, Роман Кожатовпа Алексей Князевăн – 3-шер, Алексей Лесинăн – 2, Дмитрий Степановăн, Владислав Жученковăн, Константин Паденевăн, Александр Балыбердинăн, Артем Бычковăн – пĕрер.
Йĕпреçри футбол клубĕ Республика чемпионачĕн виççĕмĕш йĕркине йышăнчĕ, иккĕмĕшĕнче – Шупашкарти ОМОН.
С.ЧИКМЯКОВА.