00:00 28 сентября 2011 г.
Пĕтĕм Раççейри «Нацисен кросĕн» 2011 çулхи стартне Вăрнар районĕн 723 спорт тусĕ тухрĕ
Массăллă ăмăрту пуçĕнче Чăваш ен Министрсен Кабинечĕн председателĕн заместителĕ – ял хуçалăх министрĕ Сергей Павлов, район пуçлăхĕ Анатолий Кузьмин, предприятисемпе организацисен ертÿçисем, район Пухăвĕн тата вырăнти депутатсем, ял-хула поселенийĕсен пуçлăхĕсем, должноçри ытти çынсем пулчĕç. Вĕсем ĕç костюмĕсене спорт тумĕсемпе улăштарса ыттисене те чупăва хастар хутшăнма хавхалантарчĕç.
Чи кĕçĕн чупуçă пĕр çулта кăна-ха – Саша Тикинев дистанцие амăшĕ пулăшнипе тухрĕ. Иккĕленме те кирлĕ мар – спорт çемйинче çитĕнекен ача тепрер çултанах хăй тĕллĕнех старта тухĕ.
Вăрнарти Карина Федорован пĕрремĕш стартне ас тăватăп. Иккĕри хĕрпĕрчи ун чухне Шупашкарта ирттерекен кроса ашшĕ-амăшĕпе пĕрле хутшăннăччĕ. Халĕ 6-ра ĕнтĕ вăл, çавăнтанпа Пĕтĕм Раçççейри чупу кунне пĕрре те сиктермен, çитменнине, хăйĕн ÿсĕмĕнче призлă вырăна та пĕрре мар тивĕçнĕ. Кăçалхи чупăва та Федоровсем çемйипех тухрĕç. Вĕсем патне Кемеровăран тата Украинăран килнĕ тăванĕсем те – Вера Дурновцевапа Валентина Ченцова – «чирлекенсен» йышĕнче кăна пулмарĕç, хаваспах чупуçăсен ретне тăчĕç.
Çемьесенчен ку ăмăртура Вăрнарти Будановсем–Сайфутдиновсем, Чăрăшкас Хирлепри Петровсем те кашни çулах хастар. Ĕç коллективĕсенчен район администрацийĕ, районти тĕп больница, Пенси фончĕн районти управленийĕ, налук ĕçченĕсем ырă тĕслĕх кăтартаççĕ. Шĕнер Ишекри вăтам шкул учителĕсем Татьяна Владимировна Скворцова директор ертсе пынипе старт илчĕç.
Кивçурт Мăратри Геннадий Вениаминович Афанасьев çăмăл атлетикăна ачаранах иленнĕ. Районти, республикăри ăмăртусене 45 çул хутшăнать. Нацисен кросĕнче хăй ушкăнĕнче кашнинчех призерсен йышне лекет. Кăçал вăл кĕмĕл медале тивĕçрĕ. «Кунсерен 4–5 çухрăм чупмасан тем çухатнăн туйăнать», – тет вăл.
Нацисен кросĕ чăннипех те сывлăх, илем уявĕ пулса тăчĕ. Нумайăшĕ чупу çулĕ çине ÿт-пĕве çирĕплетмелле, шăм-шака çемçетмелле тухрĕ. Теприсем вара хăйсен вăйне тĕрĕслерĕç. Паллах, пултаруллă çамрăксен хитре чупăвне пăхма çав тери кăмăллă. Кÿстÿмĕрти вăтам шкулта вĕренекен Диана Политова, Калининăри шкулта вĕренекен Настя Петрова техникăна çивĕччĕн туптани сисĕнет – дистанцие ыттисене самай кая хăварса вĕçлерĕç вĕсем. Шĕнер Ишекри Семен Семенов трассăпа вĕçсе пырать тейĕн – хăйĕн ушкăнĕнче унăн чи лайăх кăтарту.
Ытти ушкăнсенчи (пĕтĕмпе 21) чемпионсем çаксем: ветерансенчен Г.Никишов (Вăрнар), 50–59 çулхисенчен – А.Иванов (Вăрнар), Н.Кондратьева (Ярмушка), 7 çулчченхисенчен – М.Федотов (Хапăс), К.Егорова (Пăртас), 2000–2003 çулсенче çуралнисенчен – С.Матвеев (Ярмушка), К.Иванова (Хăмăш), 1998–1999 çулсенче çуралнисенчен – А.Сергеев (Туçи Çармăс), 1994–1995 çулсенче çуралнисенчен – А.Николаев (Аçăмçырми), А.Кудряшова (ял хуçалăх техникумĕ), 1992–1993 çулсенче çуралнисенчен – М.Колошев (29-мĕш ПУ), 19–30 çулхисенчен – А.Политов (Кÿстÿмĕр), Л.Кузнецова (Пăртас), 31–39 çулхисенчен – И.Петрова (Чăрăшкас Хирлеп), С.Волков (Туçи Çармăс), 40–49 çулхисенчен – А.Михайлов (Сăкăт), Н.Романова (Вăрнар).
Çĕнтерÿçĕсене Чăваш ен ял хуçалăх министрĕ Сергей Павлов, район пуçлăхĕ А.Кузьмин, Чăваш Патшалăх Канашĕн депутачĕ–Вăрнарти хутăш препаратсен завочĕн директорĕ Владимир Свешников саламларĕç. «Тата пысăкрах çитĕнÿсем тумалла пултăр!» – ăнăçу сунни чĕнÿпе танах пулчĕ.
Пĕтĕм Раççейри чупу кунне республикăра пĕтĕмпе 50 пин çын хутшăннă.