00:00 24 августа 2011 г.
Китайри Шэньчженьре студентсен тĕнчери çуллахи XXVI универсиадине Вăрнар районĕн çамрăкĕсем иккĕн тан хутшăннине пĕлтернĕччĕ.
Вячеслав Ластухин студентсен вăййин малтанхи кунĕсенчех йывăр атлетикăра «кĕмĕлпе» чăваш çĕршывĕн ятне çĕклерĕ.
Вырсарни кун Хурăнсур Çармăс хĕрачи Екатерина Горбунова та Раççей командине медаль парнелерĕ – 1,5 километрта вăл «бронза» çĕнсе илнĕ.
Ентешĕмĕр хăй çак ăмăртуран пысăкрах результат кĕтнине палăртнă. «Манпа тупăшакансем финиш умĕн хăйсен ăсталăхне уйрăмах лайăх кăтартма пултарнине пĕлнĕ. Çавăнпа хăю патне çитме 500 метр юлсан хăвăртлăха ÿстертĕм. Вĕсенчен иртме урăхла шанăç çукчĕ. Турцин ăста атлечĕ чупăва сăнасах пычĕ, çаврăну вăхăтĕнче вăл мана сукмакăн виççĕмĕш йĕрĕ çине хĕссе кăларчĕ. Çапла финиша маларах çитесси пулмарĕ», – пĕлтернĕ Катя «Весь спорт» информаци агентствине.
Пултаруллă чупуçă халĕ Шупашкарти Олимп резервисен училищинче вĕренет, вăл та А.Игнатьев ячĕллĕ спорт хатĕрленĕвĕн центрĕнче ăсталăха ÿстерет. Кăçал вăл тĕнче класлă спорт мастерĕн нормативне те тултарма пултарчĕ.
С.ЧИКМЯКОВА.