00:00 20 июля 2011 г.
Çăмăл атлетика енĕпе çамрăксем хушшинче Чехири Острава хулинче иртнĕ Европа чемпионатĕнче Екатерина Горбунова кĕмĕл медаль çĕнсе илнĕ
Катьăшăн сенкер экранпа пынă тÿрĕ эфирта хытах «чирлерĕмĕр». Пирĕн шанăçа вăл тÿрре кăларчĕ-кăларчех – 5 километрта Раççей командине иккĕмĕш вырăн парнелерĕ. Çĕршыв команди вара чунсенче мăнаçлăх çуратрĕ – Европăра пĕрремĕш! Çитĕнÿсен енчĕкĕнче – 10 ылтăн, 6 кĕмĕл тата 5 бронза медаль.
Вăрнарсен пултаруллă хĕрĕ спортри пĕрремĕш утăмсене Çĕрпелти вăтам шкулта вĕреннĕ чухне Анатолий Степанов физрук пулăшнипе-ертсе пынипе тунă. Паллах, ашшĕ те – Хирпуçĕнчи шкулта физкультурăна вĕрентекен Юрий Горбунов та – пысăк витĕм кÿнĕ: хĕрне пĕчĕклех сывă пурнăç йĕркипе туслаштарнă. Халĕ Катя паллă тренерсем – Валентин Даваловпа Михаил Кузнецов – патĕнче ăсталăха ÿстерет, çине-çинех хăйĕн çитĕнĕвĕсемпе савăнтарать.
Вăрнар район команди вара республикăри «Урожай» спорт обществи вырăс лаптипе йĕркеленĕ ăмăртăвăн çĕнтерÿçи пулса тăнă. Командăна – Алексей Петров, Юрий Дмитриев, Дмитрий Алексеев, Вячеслав Григорьев, Алик Петров, Александр Николаев, Николай Иванов – Юрий Горбунов тренер хатĕрленĕ. Хĕрарăмсен команди те ăнăçлă вылянă – иккĕмĕш вырăн йышăннă.