00:00 08 июня 2011 г.
Раççей Федерацийĕн Генеральнăй прокурорĕн приказĕпе Вăрнар район прокуратурине ертсе пыма юстици советникне Ильфак Гарефетдинович Мифтахутдинова шаннă. Çĕнĕ прокурор хăйĕн тивĕçĕсене 2011 çулхи июнĕн 2-мĕшĕнчен пурнăçлама тытăннă. Вăл прокуратура органĕсенче чылай çул тимлет, саккунсене пурнăçланине асăрхаса тăрассипе тата граждансен прависене хÿтĕлессипе пуян опыт пухнă юрист.
Ильфак Гарефетдинович Комсомольски районĕнчи Урмаел салинче 1976 çулта çуралнă. 1998 çулта Чăваш патшалăх университечĕн юридици факультетĕнчен вĕренсе тухнă, çавăн пекех заочно майпа экономика пĕлĕвĕ илнĕ. Малтанах Президент администрацийĕн юридици пайĕнче тимленĕ. Унтан Канашри районсем хушшинчи прокурорăн помощникĕнче, Чăваш Республикин прокуратуринче тата Шупашкарти Мускав район прокурорĕн аслă помощникĕнче ĕçленĕ. 2005 çултанпа – Комсомольски район прокурорĕн заместителĕ, 2007 çулхи июньтен – Шăмăршă район прокурорĕ. Çак вăхăтра шаннă должноçсенче хăйне лайăх енчен кăна кăтартнă, ăста ертÿçĕ пулнине çирĕплетнĕ.
И.Мифтахутдинов çемьеллĕ, мăшăрĕпе ывăлпа хĕр ÿстереççĕ.